कतै समवेदना छर्दैछु-(गजल)
कतै शुभकामना कतै समवेदना छर्दैछु
जिउने नाममा औपचारिकता पूरा गर्दैछु।
‘नमस्ते’, ‘धन्यवाद’ र ‘माफगर्नुस् है !’ को सहरमा
आत्मीयताविहीन सम्बन्धको जालोमा पर्दैछु।
मनको आँगनीमा सपना-फूल फुल्न छाडेन
ओइलाएका फूलसँगै, म पनि थोरै मर्दैछु।
प्रत्येक मनमा दन्कँदो छ शिखर चढ्ने आगो
पानी बनेर म हिजोआज, फेदी तिर झर्दैछु।
आँसुको मूल फुटाउने जस उनीलाई जान्छ
भएर ‘विभोर’ फेरि आज त्यतै तिर सर्दैछु।
मधुसुधन पाण्डे
छत्रदेव गाउँपालिका,अर्घाखाँची