रात्रिकालीन व्यवसाय सञ्चालन गर्न दिन होटेल व्यवसायीको माग

लुम्बिनी संवाददाता
बुटवल
रुपन्देहीका होटेल तथा रेष्टुरेण्ट व्यवसायीले बुटवलसहित रुपन्देहीका प्रमुख बजारमा रात्रिकालीन व्यवसाय सञ्चालनको अनुमति दिन रुपन्देही प्रशासनसँग माग गरेका छन् ।

होटल तथा रेष्टुरेण्ट व्यवसायी संघ रूपन्देहीले  बुटवल उप–महानगरपालिका, तिलोत्तमा नगरपालिका, सिद्धार्थ नगरपालिका र सैनामैना नगरपालिकाका प्रमुख, जिल्लाका चार वटै सुरक्षा निकाय प्रमुखहरुको रोहबरमा प्रमुख जिल्ला अधिकारी बासुदेव घिमिरेलाई ज्ञापनपत्र बुझाउँदै रात्रिकालीन व्यवसाय सञ्चालनको अनुमति  मागेका हुन् ।

संघका अध्यक्ष लेखनाथ भण्डारीले रात्रिकालिन बजारका लागि आवश्यक पूर्वाधारहरु बनिसकेकाले आर्थिक मन्दी र प्रदेश राजधानी दाङ  सरेपछि खस्केको रुपन्देहीको बजारलाई चलायमान बनाउन बुटवलको कालिकापथमा रातको २ बजेसम्म, बुटवलकै अमरपथ र ट्राफिकचोकमा रातको १२ बजेसम्म, बुटवलको अन्य क्षेत्रमा रातको ११ बजेसम्म, सिद्वार्थ नगरनगरपालिका, तिलोत्तमा नगरपालिका, सैनामैना नगरपालिका र देवदह नगरपालिकाको राजमार्ग र बजार क्षेत्रमा रातको ११ बजेसम्म व्यवसाय सचालन गर्न अनुमति दिन माग गरे ।  रात्रिकालीन व्यवसाय सञ्चालन गर्न सकेमा भारतीय पर्यटकलाई भित्राउन र पर्यटकको बसाइ लम्ब्याउन सकिने भण्डारीले बताए । रुपन्देहीमा पर्यटकस्तर र त्यसभन्दा माथिका पाँच सय बढी होटेल–रेष्टुराँ सञ्चालनमा छन् ।

‘बुद्ध जन्मस्थल लुम्बिनी घुम्न आएका,बेलहिया नाका हुँदै भित्रिने पर्यटक र गौतमबुद्ध विमानस्थलमा अवतरण हुने यात्रुलाई रातको समयमा सहज रुपमा सेवा दिन रात्रिकालिन व्यवसाय आवश्यक छ,’ अध्यक्ष भण्डारीले भने–‘कोरोना महामारी, आर्थिक मन्दी र प्रदेशको राजधानी दाङ सरेपछि संकटमा परेको रुपन्देहीको व्यवसायलाई चलायमान बनाउन र व्यवसायीलाई थप पलायन हुनबाट रोक्न प्रशासन र सुरक्षा निकाय व्यवसायीका मागमा संवेदनशील हुन जरुरी छ ।’ रात्रिकालीन बजार सञ्चालनका लागि संघलेयसअघि पनि प्रमुख जिल्ला अधिकारी, जिल्लाका सुरक्षा निकाय, व्यवसाविक संघसस्था, स्थानीय सरकारसँग छलफल र बैठक बसी निर्णय गरेको भण्डारीले बताए ।

ज्ञापनपत्र बुझेपछि प्रमुख जिल्ला अधिकारी बासुदेव घिमिरेले कास्कीको प्रमुख जिल्ला अधिकारी हुँदा पोखरामा आफूले नै नेपालमा पहिलोपटक रात्रिकालीन व्यवसाय शुरु गराएको स्मरण गर्दै रुपन्देहीमा झन् आवश्यक भएको बताए । उनले सानो कुराले ठूलो परिवर्तन ल्याउन सक्ने बताए ।

स्थलमार्गबाट सबैभन्दा धेरै पर्यटक आउने बेलहिया नाका, विश्वभरका बौद्धमार्गी घुम्न आउने अन्तर्राष्ट्रिय पर्यटकीय स्थल लुम्बिनी नजिकै रहेको ठाउँमा रात्रिकालीन बजार आवश्यक भएको भन्दै उनले मापदण्ड पुरा गरेमा आफूले अनुमति दिने प्रतिबद्धता जनाए ।

‘रुपन्देहीमा रात्रिकालीन व्यवसाय एकदमै आवश्यक छ, तपाईंहरु मापदण्ड पूरा गरेर तयार हुनुस्, हामी अनुगमनमा आउँछौं, मापदण्ड पूरा भएको पाइए तत्काल अनुमति दिन्छौं,’ घिमिरेले भने–‘त्यसभन्दा अगाडि कुनै व्यसायीले व्यक्तिगतरुपमा मापदण्ड पूरा गरेमा पनि जसलाई आवश्यक छ उनीहरुलाई दिँदै जान्छौं ।’
रात्रिकालीन व्यवसाय सञ्चालन हुँदैमा सुरक्षा चुनौती, बेथिति, विकृति र अपराध वृद्धि नहुने स्पष्ट पार्दै उनले स्थानीय सरकारको साथ आवश्यक पर्ने औंल्याए ।

रुपन्देहीका प्रहरी उपरीक्षक रन्जितसिंह राठौरले पहिलो चरणमा कुनै एक स्थान तोकेर रात्रिकालीन व्यवसाय सञ्चालनको परीक्षण गर्ने र त्यसपछि क्रमशः विस्तार गर्न प्रहरी तयार रहेको बताए ।

सो अवसरमा बुटवल उप–महानगरपालिकाका  प्रमुख खेलराज पाण्डे, तिलोत्तमा  नगरपालिकाका  प्रमुख रामकृष्ण खाँण, सिद्धार्थ नगरपालिकाका प्रमुख इस्तियाक अहमद खान, सैनामैनाका नगरप्रमुख फणिन्द्र शर्मा, मानवअधिकार तथा शान्ति समाजका पूर्व केन्द्रीय सभापति गोविन्द खनालले रात्रिकालिन व्यवसाय सञ्चालनमा स्थानीय सरकारको साथ रहने प्रतिबद्धता जनाए ।

बुटवल उप–महानगरपालिकाले कार्यपालिका बैठकबाट रात्रिकालीन बजार सञ्चालन गर्न दिने  निर्णय गरिसकेको छ ।