मंसिर २१ र २२ गते रिब्दीकोट रैनादेवी छहरा दोश्रो सुन्तला महोत्सव- २०८१ हुने !

लुम्बिनी प्रदेशको पाल्पा जिल्लाका रिब्दीकोट गाउँपालिका र रैनादेवी छहरा गाउँपालिका सुन्तला खेतीमा प्रख्यात छन्। रिब्दीकोट गाउँपालिकाका आठ वटा वडामध्ये चारवटा वडा र रैनादेवीका केही वडाका किसानहरू केही वर्ष यता व्यवसायिक रूपमा सुन्तला खेतीमा लागेका छन् । उनीहरूको आम्दानीको मुख्य स्रोत नै सुन्तला हो।

स्थानीय किसानहरूका अनुसार खेतबारीमा फल्ने धान, मकै र गहुँबाट हुने आम्दानीको तुलनामा त्यति नै क्षेत्रफलमा लगाइएको सुन्तलाबाट निकै बढी आम्दानी हुन्छ। श्रम पनि कम पर्छ । अन्न खेतीबाट भन्दा सुन्तलाबाट घर खर्च धान्न सजिलो हुने भएपछि किसानहरू सुन्तलाखेतीमा आकर्षित भएका हुन् ।

रिब्दीकोट र रैनादेवी छहराका अधिकांश किसानले पाखोबारीमा लगाएका बगैँचाबाटै वार्षिक एक लाखदेखि २० लाख रुपैयाँसम्म आम्दानी गरेका छन् । किसानहरू कात्तिक लागेपछि फाटफुट रूपमा सुन्तला बेच्न सुरु गर्छन् । मध्य मंसिरमा आइपुग्दा उनीहरू सुन्तला टिपेर बजार पुर्‍याउने प्रबन्ध गर्न व्यस्त हुन्छन् । पाकेका सुन्तलाले बगैँचा पहेँलै भएको छ । यही मौकामा रिब्दीकोट गाउँपालिकाको आयोजनामा “रिब्दीकोट रैनादेवी छहरा दोश्रो सुन्तला महोत्सव- २०८१” हुने भएको छ । साेमबार रिब्दीकोट गाउँपालिका अध्यक्ष  नारायण बहादुर कार्कीको अध्यक्षतामा सम्पन्न भएको बैठकले दोश्रो सुन्तला महोत्सव- २०८१ गर्ने निर्णय गरेको हाे ।

छलफल कार्यक्रम रैनादेवी छहरा गाउँपालिका अध्यक्ष  रुक्मांगत भट्टराईको प्रमुख आतिथ्यता एवं रिब्दीकोट गाउँपालिका उपाध्यक्ष  कान्ता अधिकारीको बिशिष्ट आतिथ्यता तथा रिब्दीकोट गाउँपालिका र रैनादेवी छहरा गाउँपालिकाका जनप्रतिनिधिहरुकाे उपस्थितिमा रिब्दीकोट गाउँ कार्यपालिकाको कार्यालय खस्यौली, पाल्पामा छलफल कार्यक्रम सम्पन्न भएको छ । दुबै पालिकाको संयुक्त छलफलबाट “रिब्दीकोट रैनादेवी छहरा दोश्रो सुन्तला महोत्सव- २०८१” यहि मंसिर २१ र २२ गते रैनादेवी छहरा गाउँपालिका वडा न. ५ स्थित कटौजेपानी खेल मैदानमा संचालन गर्ने निर्णय गरि छलफल कार्यक्रम सम्पन्न गरिएको रिब्दीकाेट गाउँपालिकाका अध्यक्ष नारायण बहादुर कार्कीले बताउनुभयो ।

सुन्तला खेतीप्रति किसानहरूको आकर्षण बढ्दै गएकाले खेतीमा निरन्तरताका लागि प्रोत्साहन गर्न र सुन्तलाको बजारीकरणमा सहयोग पुर्‍याउने उद्देश्यले महोत्सव आयोजना गरिएको बताउनुभयो । दोश्रो सुन्तला महोत्सव- २०८१ लाई ब्यवस्थित रुपमा संचालन गर्नका लागी रैनादेवी छहरा गाउँपालिका अध्यक्ष  रुक्मांगत भट्टराईको संयोजकत्वमा मुल समारोह समिती समेत गठन गरिएको छ । कार्यक्रम गाउँपालिका अध्यक्ष भट्टराईले स्थानीय सरकारको सहयोगले कृषकहरूलाई प्रोत्साहन मिल्ने विश्वासले महोत्सव आयोजना गरिएको बताउनुभयाे ।