मायादेवी खानेपानीले वितरण गरेको पिउने पानीमा लेदो भेटियो
देवदह । मायादेवी खानेपानी उपभोक्ता तथा सरसफाई संस्थाले वितरण गरेको पिउनेपानीमा लेदो भेटिएको छ । संस्थाले पिउन योग्य भनेर भवानीपुर क्षेत्रमा पठाएको पानीको धारामा लेदो भेटिएको हो ।
देवदह नगरपालिका वडा नं ४ का स्थानीय छवि भट्टराईले खानेपानीमा लेदो भेटिएको भन्दै संस्थाको कार्यसमितिले त्यसको जिम्मा लिनुपर्ने बताएका छन् । उनले सामाजिक संजालमा लेदो सहितको पानीको फोटो समेत सार्वजनिक गरेका छन् । सेतोमसीसंग कुरा गर्दै अधिवक्ता समेत रहेका भट्टराईले शुद्ध खानेपानी नागरिकको नैसर्गिक अधिकार भएको बताए । उनले भने,ुपटकपटक यसरी खानेपानीको धारामा लेदो आउँदा समेत सुधारको लागि पहल नगरिनु र खानेपानीको अवलोकन गर्न भन्दै पदाधिकारीहरू सिरुबारी भ्रमण जानुले उपभोक्ताप्रति संस्थाका पदाधिकारीहरू उदासिन रहेको देखाउँछ ।ु
त्यसैगरी अर्का उपभोक्ता गणेश तिमिल्सिनाले खानेपानी निकै अशुद्ध रहेकोले समस्या समाधानमा ध्यान दिनुपर्ने बताए । उनले स्वास्थ्य संबेदशिलतालाई ध्यान दिंदै समस्या हल गर्नको लागि पाइप सफा गर्नुपर्ने विचार राखे ।
खानेपानीमा देखिएको समस्याबारे सेतोमसीले राखेको जिज्ञासामा संस्थाका अध्यक्ष चक्रपाणी तिवारीले सतहमा पानी नभएको र अनियमित विद्युत आपुर्तीका कारण समस्या भएको बताए ।असारभन्दा पहिले फिल्टर नगरी उपभोक्ताको धारामा पानी पठाइएको भएपनि त्यसयता फिल्टर गरेर पानी पठाइएको छ । पहिले नै पाइपमा जमेको लेदोको कारण समस्या भएको होकी भन्ने अनुमान छ । उनले भने,अन्य स्थानमा समस्या छैन तर भवानीपुर क्षेत्रका धारामा समस्या देखिएको गुनासो आएपछि परिक्षणको लागि खानेपानी डिभिजन कार्यालय योगीकुटीसंग प्राविधिक सहयोग मागिएको छ । शुक्रबारसम्म प्राविधिक टोलीले अध्ययन गरेर दिएको सुझाब अनुसार हामी अघि बढ्छौं ।
वि सं २०७३ सालमा स्थापना भएको मायादेवी खानेपानीमा हाल ९६५ घरधुरीले धारा जडान गरेका छन् । जहाँ दैनिक ३ लाख लिटर पानी खपत हुने संस्थाले जनाएको छ ।दुइवटा बोरिङ्गबाट २२ सय घरधुरीलाई खानेपानी उपलब्ध गराउने लक्ष्य लिएको संस्थाले बिहान २ घण्टा र बेलुका २ घण्टा गरि दैनिक ४ घण्टा पानी वितरण गर्दै आएको छ ।
