सेयर बजारमा उत्साह

परिसूचकमा सुस्तता आउँदा कारोबार रकम समेत १ अर्बभन्दा तल कायम रहँदै आएको थियो । आज भने ५ अर्ब १५ करोड रुपैयाँभन्दा धेरैको सेयर किनबेच भएको छ । आज १ करोड ७१ लाख कित्ता सेयर किनबेच हुँदा ५ अर्बभन्दा धेरैको कारोबार भएको हो । परिसूचक २७ अंकले बढ्दा १८५ कम्पनीको सेयर मूल्य बढेको छ भने ५२ कम्पनीको मूल्यमा गिरावट आएको छ । ४ कम्पनीको सेयर मूल्य भने स्थिर छ ।

परिसूचक र कारोबार रकममा उत्साहजनक वृद्धि हुँदा ११ वटा कम्पनीको सेयर मूल्य १० प्रतिशतले बढेको छ । यस्तै, १६ कम्पनीको सेयर मूल्यमा ९ प्रतिशतभन्दा धेरैको वृद्धि आएको छ । समग्रमा आज १८५ वटा कम्पनीको सेयर मूल्यले उकालो यात्रा तय गरेको छ । यसक्रममा आज हिमाल दोलखा हाइड्रोपावरको सेयर २५ करोड २९ लाख रुपैयाँ बराबरको सेयर किनबेच भएको छ ।