सहयोग कुर्दै प्रधानमन्त्री दैवी प्रकोप उद्धार कोष
काठमाडौँ । जाजरकोट केन्द्रबिन्दु भएर गएको भूकम्पपछि सरकारको उपस्थिति घटनास्थलमा देखिएपनि आश्वस्त हुने गरी पीडितले राहत पाएका छैनन् । विभिन्न संघसंस्थाहरु राहत लिएर पुगेका छन् । सम्बन्धित जिल्ला प्रशासन कार्यालयमार्फत राहत पठाउने काम भइरहेको छ । तर, भूकम्प गएको दुई दिन बितिसक्दा पनि धेरै पीडितहरु खुला आकाशमुनि रात बिताउन बाध्य देखिन्छन् ।
विपद्मा तत्काल खर्च गर्न मिल्ने गरी कोष खडा गरिएको छ । प्रधानमन्त्री दैवी प्रकोप उद्धार कोषमार्फत सरकारले पीडितको उद्धार, राहत र पुनस्र्थापनाको काम गर्छ । २०७२ वैशाखको भूकम्पमा पनि यसै कोषमार्फत सरकारले २२ अर्बभन्दा बढी खर्च गरेको थियो । अहिले यो कोषमा जम्मा तीन अर्ब रुपैयाँ छ ।
आर्थिक प्रशासन शाखाका उपसचिव सूर्य भण्डारीले कोषमा जम्मा हुन आएको रकम गृह मन्त्रालयमातहत रहेको राष्ट्रिय विपद् जोखिम न्यूनीकरण तथा व्यवस्थापन प्राधिकरणमार्फत खर्च हुने गर्दछ । ‘ अहिलेसम्म कोषमा कति रकम जम्मा भयो भनेर यकिन जानकारी छैन,’ भण्डारीले रातोपाटीसँग भने,‘ हामीले खाता खोलिएका बैंकसँग समन्वय गरिरहेका छौँ, चार बजेसम्म के कति जम्मा भयो भन्ने जानकारी आउँछ ।’
