काठमाडौं । काठमाडौँको ल्होत्से मल क्षेत्रमा हिजो आन्दोलनका क्रममा ८ देखि १० करोडको लुटपाट भएको व्यवसायीले दाबी गरेका छन् ।
सोमबार साँझ आन्दोलनरत यातायात मजदुर ल्होत्से मलमा पसेर मोबाइल पसलहरु फोडेका थिए । त्यसक्रममा ३ मोबाइल पसलमा लुटपाट भएका भिडियोहरु सामाजिक सञ्जाल भरी भाइरल भएको देख्न सकिन्छ ।
भिडियोमा आन्दोलनकारीहरुले ल्होत्से मलको एउटा मोबाइल पसलमा सिसा फुटाएर प्रवेश गरेको र मोबाइललगायत पार्टपुर्जा लुट्दै गरेको देख्न सकिन्छ । घटनामा नियन्त्रणमा लिइसकेको एक आन्दोलनकारीलाई गार्डलगायतले पिट्दै गरेको पनि भिडियोमा देख्न सकिन्छ ।
अर्को एक भिडियोमा आन्दोलनकारीको जत्थाले सटर नै खोलेर मोबाइल पसलमा रहेका मोबाइललगायत पार्टपुर्जा लुट्दै गरेको देख्न सकिन्छ । मोबाइलको स्टोर, सर्भिस सेन्टर र पसलबाट विभिन्न मोडलका मोबाइल तथा पार्टपूर्जा लुटपाट भएको नेपाल मोबाइल व्यवसायी संघले जनाएको छ । घटनाबारे थप अनुसन्धान भइरहेको प्रहरीले जनाएको छ ।
