असोजमा मृत भेटिएका दुई युवाले प्रयोग गरेको मोटरसाईकल खोलामा भेटियो
पाल्पा, गत असोजमा निस्दी–४, मित्यालमा दुई युवाहरु संगै हराएको मोटरसाईकल फेला परेको छ । निस्दी ४ को पाकरी खोला र रामु खोलाको दोभानमा आइतबार मोटरसाईकल भेटिएको हो ।
रहस्यमय भनिएको घटनामा निस्दी गाउँपालिका–३, झिरुवास भलुवाका दुई युवाहरु मृत अवस्थामा भेटिएका थिए । मोटरसाईकल लिएर घरबाट भलिबल खेल हेर्न हिँडेका निस्दी–३, झिरुवास भलुवाका २१ वर्षीय वीरेन्द्र सोमै र सोही गाउँका २३ वर्षीय इन्द्रबहादुर खरु मगर मृत भेटिएका थिए ।
निस्दी गाउँपालिका–४, मित्याल मौलाथरमा असोज १७ गते भलिबल हेर्न हिँडेका सोमै र खरु घर नफर्किए पछि खोजी गदै जाँदा निस्दी गाउँपालिका– ५, गल्धाको ढुंगानाबेंसी नजिकै पाकरी खोलामा इन्द्र र निस्दी– ४, मित्यालकै पाकरी खोलामा मोटरबाटो तल वीरेन्द्रको शव विभत्स अवस्थामा भेटिएको थियो ।
पहिरोमा हराएको लु ३३ प ३८९२ नम्बरको मोटरसाईकल फेला परेको इलाका प्रहरी कार्यालय रामपुरका प्रहरी निरिक्षक लक्ष्मण देवकोटाले जानकारी दिनुभयो । मोटरसाईकल स्थानीयले देखे पछि प्रहरीलाई खबर गरेको र उक्त मोटरसाईकल उत्खनन् गरी निकालेको देवकोटाले बताउनुभयो ।
मृत भेटिएका युवाहरुले प्रयोग गरेको मोटरसाईकलको यस अघि ले गार्ड मात्र भेटिएको थियो । अहिले मोटरसाईकलको इन्जिन र अन्य भाग भेटिएको हो ।
